تجربة احد طلاب السنة الاولى المشتركة المسار العلمي – جامعة الملك سعود
تجربة احد طلاب السنة الاولى المشتركة المسار العلمي – جامعة الملك سعود
تجربتي في السنة الأولى المشتركة في جامعة الملك سعود بالمسار العلمي:
السنة الأولى المشتركة ( السنة التحضيرية سابقًا ) بشكل عام تجربة فريدة لأي طالب متخرج من المرحلة الثانوية، خلال هالسنة راح يتعلم أمور عديدة على الصعيد الشخصي والأكاديمي، ويتعرف على زملاء وأعضاء هيئة تدريس مميزين.
بالنسبة لي خطتي للترم الأول تضمنت المواد التالية:
1. اللغة الإنجليزية
2. الرياضيات
3. الحاسب الآلي
4. اللغة العربية
5. ريادة الأعمال
أولًا: بالنسبة للغة الإنجليزية فسيتم إجراء إختبار الكتروني تقوم بحله من منزلك ولا يجب حضورك للجامعة لإجراء هذا الإختبار، نصيحتي لأي طالب أنه يحل الإختبار من نفسه دون مساعدة أحد أو مذاكره، لأن هذا الاختبار بالنهاية راح يصنف مستواك باللغة الإنجليزية حسب ثلاث مستويات وضعتها الجامعة هم ليفل ( A – B – C )، ليفل C يعتبر المستوى الأعلى ويليه ليفل B ثم ليفل A، بحسب مستواك راح تدرس كتب معينة وعدد ساعات معين بالاسبوع، بالنسبة للترم الأول كان سهل بالنسبة للغالب تقريبًا، الاختبار النهائي والنصفي كانوا موحدين بين اللفلات ونفس مستوى ليفل A وراح يوزعون على الجميع ملف PDF يحتوي على كل شي مهم يتعل�� بالاختبار، وعندك مشروعين بالسنة هم مشروع Speaking وبعده مشروع Writing وكل مشروع عليه ٧ أو ٨ درجات تقريبًا بالإضافة إلى تمارين تحلها على LMS عليها ٥ درجات وعندك إختبار Writing و Speaking بنهاية الترم وسهلة جدًا، المادة عليها ٦ ساعات وتأثر بالمعدل بشكل كبير لذلك الواحد المفترض يحرص عليها عشان يحافظ على معدل عالي.
ثانيًا: بالنسبة للرياضيات كانت المادة التي تحتاج تركيز بالنسبة لي أكثر من باقي مواد الترم، لأنها تمثل ١٥٪ من توزيع درجات كلية الهندسة والحاسب، غير كذا عليها ٣ ساعات، المادة باختصار تحتاج لإهتمام من الطالب، ما اقولك ذاكر يوميًا لكن عالأقل لا يمر اسبوع الا وانت مراجع الجزئية اللي اخذتها بالمحاضرة، بالنسبة للاختبارات فحاول تحل نماذج سابقة للاختبارات لانها غالبًا راح تجيك بنفس النمط لذلك حلك لنماذج سابقة راح يخليك جاهز بإذن الله، طبعًا الإختبار النهائي من ٥٠ درجة والشهري من ٣٠ والكويزات من ١٠ والواجبات من ١٠، زي ما قلتلكم المادة ذي محتاجة تركيز واهتمام وان شاء الله تجيبون درجات عالية فيها، وأيضًا عندك دورات ممتازة منتشرة بالإنترنت شارحين الناس فيها المادة تقدرون تشيكون عليها.
ثالثاً: بالنسبة للحاسب فهي مادة سهلة، ممكن اشكاليتها الوحيدة اللي هي اللغة الانجليزية للي مستوياتهم بالإنجليزي مب جيدة، مدرسين المادة بالغالب من الجنسية الهندية وكل المدرسين اللي مروا علي كانوا طيبين جدًا ومتساعدين مع الطلبة قدر ما يقدرون، الكتاب يتألف من قسمين قسم نظري وقسم عملي، القسم النظري يتكلم عن الحاسب والانترنت ووحدات التخزين وهالأمور، وراح تختبر على هالجزئية بالاختبار الشهري وخلاص ما راح تخش معك بالنهائي، بالنسبة للقسم العملي يتكلم عن الوورد والاكسل والباوربوينت وراح يكون الاختبار النهائي عليه، طبعًا المصدر الرئيسي للمذاكرة هو الكتاب كذلك عندك رومات سوكراتيف ممتازة بالإضافة للإختبارات السابقة وممكن مدرسكم يخليكم تحلون اختبار تجريبي راح يفيدكم كثير، غير الاختبارات هذي بيكون عندكم مشروع ولك الخيار تسويه مع مجموعة او بلحالك.
رابعًا: بالنسبة للغة العربية فهي مادة عليها ساعتين وتدرسونها مرة بال��سبوع، المادة سهلة بشكل عام ومشابهه للي اخذناه بالمرحلة الثانوية، الكتاب هو المصدر الرئيسي للمذاكرة وتقدر تستفيد من الاختبارات السابقة سواء للنهائي او الاختبار الشهري، وعندكم مشروع كتابة مقال تسلمونه بآخر الأسابيع والتصحيح بالغالب يعتمد على دكتورك بعضهم حبيّب وما يدقق بالتصحيح لكن بعضهم يدقق بشكل مزعج لذلك الأفضل انك تبدا كتابة المقال من بدري وتراجع مع دكتورك اسبوعيًا.
خامسًا: بالنسبة لريادة الأعمال فهي عليها ساعة وحدة بالمعدل، وكنا نداوم اسبوع واسبوع لا ويعتمد هالشي على محاضرك غالبًا، طبعًا التركيز راح يكون على المشروع اللي تسوونه انت ومجموعتك غالبًا بالاضافة للاختبار النهائي والشهري، المادة لها أسئلة سابقة تقدرون تستفيدون منها باختباراتكم لانها تتكرر واجد.
بالنسبة لي خطتي للترم الثاني تضمنت المواد التالية:
1. اللغة الإنجليزية
2. الكيمياء
3. الإحصاء
4. المهارات الجامعية
5. صحة ولياقة بدنية
أولًا: بالنسبة للإنجليزي كان مثل الترم الأول لكن الملاحظ أن الأسئلة زاد مستوى صعوبتها شوي وأثرت على معدلات البعض، لكن ما بالنسبة للمشاريع والأمور الثانية فهي سهلة جدًا زي اول ترم.
ثانيًا: بالنسبة للكيمياء فهي مادة عليها ٤ ساعات من المعدل وكنا ندرسها بكلية العلوم، المادة تتكلم عن اساسيات الكيمياء بشكل عام والمحاضرين يشرحون من السلايدات ومعتمدينها، المادة محتاجة اهتمام خصوصا ان عليها ٤ ساعات وتأثيرها كبير عالمعدل، راح يكون عندكم اختبارين شهريين كل واحد منهم عليه ١٥ درجة
وبعدين الاختبار النهائي عليه ٤٠ درجة، المصدر الاساسي للمذاكرة غالبًا هو السلايدات كذلك عندكم مذكرة نيجيريا ( بنك الأسئلة ) جدًا ممتازة والأسئلة تجي بنفس طريقتها وكذلك النماذج السابقة، باقي الدرجات تعتمد على الجزء العملي واللي راح يكون المحاضر حقه مختلف عن النظري، ١٠ درجات راح تعتمد على حضورك وتسجيل التجارب بالمذكرة، وعندك اختبارين شهريين كل واحد عليه ١٠ درجات، بالمختبر لازم يكون معك البالطو والمذكرة لان بعض الدكاترة يدققون بشكل كبير عليهم.
ثالثًا: بالنسبة للإحصاء فهي مادة سهل استيعابها بعكس الرياضيات لكن مشكلتها كثرة القوانين والكتاب فيه أخطاء كثيرة جدًا تحتاج تعديل، عدد ساعتها بالمعدل ٣ ساعات وتقسيم الدرجات فيها زي الرياضيات، بالنسبة للأختبارات الشهرية والنهائية فنمطها مشابه جدًا للاختبارات السابقة بشكل كبير، الكويز الأول كان سهل، لكن بالنسبة للكويز الثاني فكانت فيه صعوبة شوي بالأسئلة، لكن الاهتمام فيها راح يجعلها سهلة بإذن الله.
رابعًا: بالنسبة للمهارات الجامعية فعليها ٣ ساعات مثلها مثل الريض والاحص والحاسب وسهلة بالغالب أغلبها قراء�� وفهم ونص الكتاب يتكلم عن مهارات البحث العلمي واللي راح تساعدكم بالمشروع حق البحث، وعندكم كذلك بريزينتشن، المادة وزنها عالي لذلك فرصة انك تستغل هالشي وتجيب فيها تقدير عالي، تقدر تستفيد من النماذج السابقة بشكل كبير جدًا.
خامسًا: بالنسبة للصحة واللياقة فهي مادة عليها ساعة وحدة بالمعدل، تدرسها مرة بالاسبوع ساعة نظري وساعة لياقة ورياضة، المادة جدًا سهلة واغلبها معلومات عامة الغالبية يعرفونها مسبقًا، طبعًا المصدر الرئيسي للمذاكرة هو الكتاب وزي ما قلت قبل تقدر تستفيد من الاختبارات السابقة لانها بتجي بنفس النمط وتقدر تتوقع منها نوعية الأسئلة اللي بتجيك.
بالنهاية أتمنى لكم التوفيق جميعًا وتدخلون التخصصات اللي تتمنونها، هذي كانت خلاصة تجربتي بالسنة الاولى المشتركة وهي بالغالب سهلة للشخص المهتم والمجتهد، وكذلك احرصوا على متابعة ساعات غيابكم لتجنب الحرمان وايضاً الحرص على حضور المواد المهمة.
